【我要做老師!】揭秘JS4331 – 中文大學:中文教育 | CUHK Chinese Language Education

教育系一直都係好多同學嘅熱門選擇,而中大嘅中文教育都係一直受到一眾有志參與教育行業嘅同學嘅歡迎。想知多啲?我地邀請到我地其中一位讀緊中大中教嘅筆記創作者 @skm.dsesharing 同大家分享好多有關呢科既資訊。相信可以幫助大家衡量長遠黎講呢科適唔適合自己。快啲落去睇啦!

 1. 入學須知 

中大中教唔算難入(比起中文系黎講)~DSE只要24-25分以上、中文5以上就有機會收架啦,冇讀文學都唔緊要!中文佔分重就一定架啦~同埋建議你真係對教育好有熱誠、想了解多啲教育理論(心理學、社會學等等)、好想做老師你先好報!如果唔想教書 而只係對中文、文學有興趣就建議你揀返中文系啦!

 2. 科目與學業

我地嘅課程係5-Year嘅Programme黎~ 總共要讀155個Credit (學分),讀曬先可以畢業架 我地有好多唔同嘅Course要讀 大概可以分成六個部分

  • 中文系Course CHLL:中文本科知識 (eg: 文學史、詩選、文學概論等等),同中文系同屆同學一齊上堂
  • 教育系Course EDUC:教育本科知識(eg: 兒童及青少年發展心理學、課程設計、教育社會學等等)
  • 中文教育Course CLED:中文教學本科知識(eg: 中文教育心理學、語言思維與寫作、中文教學法等等)
  • 大學通識:UGFN、UGFH、UGEA/B/C/D、大中 (DSE中文5**可以exempt)、大英 (DSE英文5* 可以exempt 一年 Year 2、3要讀)
  • 教學實習:Year 4 小學、Year 5 中學
  • 境外沈浸課程:去外地學2個月普通話同埋考普通話水平測試 (本來係去北京,但而家有機會去台灣!)

【按此查看:中大中教詳細教程】

3. 最深刻嘅大學課程、活動

我最鍾意嘅一定係教育社會學 EDUC 2240 Principle of Schooling!!上個sem啱啱上完~ 佢會同你講學校係監獄!老師係監獄長、班長係獄卒! 讀完咁多年書先發現自己係資本主義底下階級制度嘅奴隸!!!同你揭示而家呢個教育制度究竟幾咁荒謬 仲有探討身為未來嘅專業老師 我地應該點樣自處等等 用社會學角度批判現今教育制度 超級inspiring!!!!

另外最深刻嘅活動一定係上莊!同朋友一齊癲一齊玩真係超開心!我記得我搞OCamp真係超認真 為左整個偵探遊戲 寫左13000字嘅劇本 結果大家都玩得好開心! 大家如果有機會入大學 記得主動探索下唔同活動!大學真係唔係淨係得讀書!(雖然我覺得讀書都係好重要……)

4. 大學生活

我上左自己嘅系莊——語文教育學會、跟住有玩新亞國樂會中樂團、有住幾個禮拜Hall(肺炎害人不淺)…… 其實我嘅大學生活唔算好精彩 不過我都已經好開心!我最鍾意係同朋友一齊合作做好一個活動 一齊奮鬥 一齊流淚 一齊嘻嘻哈哈 係青春呀!!(仲有我都好鍾意摺Lib……)

 5. 未來出路

做老師!我地呢個Programme好specific為有志投身教育行業嘅同學而設,畢業之後就可以直接教本地中小學 (當然都有好多同學畢業之後撈補習做補習天王啦哈哈哈哈)如果大家對教育有熱誠嘅歡迎報讀呀!

【延伸閱讀】更多學科揭秘 | 中文大學:生物醫學 | CUHK Biomed
【延伸閱讀】更多學科揭秘 | 中文大學:建築學| CUHK Architecture
【延伸閱讀】更多學科揭秘 | 港大:教育學士及理學士 (雙學位課程) | HKU Education & Science

雲集獨家頂尖DSE筆記資源

精心挑選狀元、導師、神科學生創作的神級DSE筆記資源

與朋友分享

Share on facebook
Facebook
Share on whatsapp
WhatsApp

Leave a Comment

你的電郵地址並不會被公開。